"Мнение Патриарха Никона о Соборном Уложении..."

Предисловие, подготовка текста и комментарии Г.В. Талиной

Како может о себе кто глаголати и написовати: се царь правдивый царствует и началницы судом владети начнут.

Истина же есть слову о Господе Бозе и Спасе нашем Иисусе Христе, о Нем же Даниил прорече: и в день царь тех постави Бог небесный царство, еже во веки не разсыплется и царство его инем не останет, отончит и извеет вся царства, а то станет во веки, якоже виде: яко отсечеся горы камык без руку и отончи глину и железо и медь и сребро, и тому ся даст власть и честь и царство, и вси людие, племена и языцы тому поработают и власть Его власть вечная, яже не мимо идет, и царство Его не разсыплется. <…>
…и иже убо святым Апостолом учительстии престоли дани быша, ими же языци световодими суть, дани же будут по Божественному обещанию и в будущем венце на осуждение отринувшим Евангельскую проповедь, якож Давид глаголет: тамо бо взыдоша колена, колена Господня, свидение Иизраилево и прочая, яко ту седоша простоли на суде и прочим святым мученикам, за Христа пострадавшим, не поклонившимся зверю и образу его, дан бысть суд сиречь власть судити, им же бесов, даже доныне, яко зрим, судят, спрославляеми Христу, даже до настоящаго века, и от царей благочестивых и князей верных почитаеми и поклоняеми.

И сия тако суть Исаино речение не о царех, ни о князех миpa сего; зде лепо есть и последующее слово пророка извести: и будет, рече, человек крыя словеса своя и сокрыется, яко водный поток и явится в Сион, яко река, источник текущий, славный в земли жаждущей. Сион бо не ино что разумеется, разве святая церковь, а яко река источник, текущи в земли жаждущей святое священное Евангелие. Таже глаголет пророк: и к сему не будут уповающе человеки. Уповающе человеки глаголет то есть се, якоже и Давид глаголет: не надеятися на человеки, аще и царие и князи. Не надейтеся, рече, на князя и на сыны человечестя, в них же несть спасения. Изыдет дух его и возвратится в землю свою, в той день погибнут вся помышления его. Блажен, ему ж Бог Ияковль помощник его, упование его на Господа Бога своего, сотворшаго небо и землю, море и вся, яже в них, хранящаго истину в век, творящаго суд обидимым, дающаго пищу алчущим и прочее. <…>

И иже ныне гордии законопреступоваху зело, и Божию честь и славу преписующе на свою, и подписующе под ногама своима и коня и орла, пророческия таинства, град царя великаго. Бог в тяжестех его знаем есть, знаем есть Господь судьбы творяй; в делех руку своею увязе грешник, не восxoте разумети, да ублажит, не восхоте разумети; взысках Господа и услыша мя и от всех скорбей моих избави мя, не восхоте разумети; се нищий возва и Господь услыша и, и от всех скорбей спасе и не восхоте разумети, смирихся и спасе мя Господь, не восхоте разумети; аще не Господь созиждет дому, всуе трудишася зиждущии; аще не Господь сохранит град, всуе бдя и стрегий. Не восхоте разумети: Господь низводит и возводит, убожит и богатит, смиряет и высит. Услышат иже ныне содержащии множество и гордящиися о народех язык, яко дана бысть от Господа держава им и сила от Вышняго, иже истяжет дела ваша и помышления испытает, яко слузи суще царства его, не судисте право, ни сохранисте закона, ниже по воли Божии ходисте, сокрушение скоро явится вам, яко суд жесточайший на тех в находящих бывает, мала бо подается милость. — Не лишает бо ся лица всех владыка, ниже устрамится велможи, яко мала и велика сей сотвори. Подобне же проразумевает о всех, державный же крепко совесть испытание, Господь бо Бог наш, сий Бог богом, Бог великий. Крепкий и страшный, иже не зрит лица, ни возмет дара, творяй суд пришелцу и сироте и вдовице, услышит, иже хваляйся о высоте престола своего и о множестве богатства своего, услышит Бог и смирит их, сый прежде век, несть бо им изменения, яко не убояшася Бога, яко Господь судия есть и несть у него славы лица. — Услышат, иже ныне Божие имя и славу прекладают на свою честь и славу и тем хулят имя Господне и славу его, якоже негде пишет Апостол: имя бо Господне вас ради во языцех хулится, и инде: и похулиша имя Бога, имущаго область над язвами сими и не покаяшася дати ему славу. Познается, иже ныне разширияся достоинством церковным и мирским, егда не будет суда, но ответ, но негодование.

Паки, ответотворче, пишешь, Матфей Властарис толкуючи, для чего ходил царь в олтарь к тайным таинством, глагола ми меж иными речи и сия, для того, что есть помазан от Бога, и для того наставляют патриархи, могут выбирать и архимандриты и игумены не могут ли выбрать. <…>

А еже ты глаголеши: для того царь ходил в олтарь, что помазан от Бога, и то ты солгал. — Помазан есть чрез архиерея на царство. И таковых мы православных правил не обретаем. Обретаем же святаго вселенскаго шестаго собора правило 69: Токмо царь един, ин же никтоже от мирских человек во очистилище да внидет. — Толкование. Недостоит никому же от всех в мирстем житии живущих внутрь священнаго олтаря входити, токможе се никако же не возбранено есть царстей власти и господьству, егда хощет принести дары создавшему его Богу, по никоему преданию древних отец. — И сия тако суть. Но царское величество сего правила не сохраняет, не точию, что приносит создавшему его Богу, по некоему преданию древних отец, но и прежде даное святей велицей церкви, благочестивыми прежде бывшими цари и великими князи, все усвоил в свои потребы, движемыя и недвижемыя вещи, о них же писано есть выше. — Богу самому заповедающему: И да не явишися пред Господем Богом твоим тощь кождо по постижению руки своея, по благословению Господа Бога своего, иже дал есть тебе. — И паки инде речеся: не явися пред Господем тощь, все бо сей заповеди ради и приношение праведнаго похвалит олтаря, и благоухание его пред Всевышним жертва мужа праведнаго приятна и память ея незабвенна будет; оком благим прослави Господа и не умали от начатка руки твоея во всяком даянии, укроти лице свое и веселием освяти десятину, даждь Вышнему по даянию его, и оком благим очищение руки, яко Господь воздаяй есть и седмицею воздаст ти, дар бо без труда не приемлет, ни приближит бо ся жертв неправеднаго, яко Господь судия есть и несть у него славы лица, не приимет лица о убозем и молитву обидимаго услышит, и кто есть обиденный, паче святыя соборныя великия церкви? Ныне есть паче сира и вдовицы. Но не имать Господь призрети молитвы сираго и вдовицы, егда извещает беседу, не слезы ли вдовицы по ланитома текут, и вопль нанесшаго ей, утоляяй благоволением, прият будет, и молитва его до облак дойдет, молитва смиреннаго пройдет облаки, дондеже приступит, не утешится и не имать отступите, дондеже посетит Вышний судити в правду и сотворит суд, и Господь не замедлит и не имать долготерпети на них, дондеже сокрушит чресла немилостивых, донележе потребит множество досадитель и скипетры неправедных сокрушит, дондеже воздаст человеку по деянию его и по делом человеческим и по помышлению их, дондеже судит судом людем своим, и возвеселит я, иже к милости его красна есть милость в день скорби его, яко же облацы дождевнии во время бездождия. Како же ты толкуешь: государю приходити во олтарь во время причастия, не сицевая творя. Господу рекшу: аще принесеши дар твой ко олтарю, и имать нечто братъ твой на тя, остави ту дар твой пред олтарем и, шед, смирися с братом своим, и тогда, пришед, принеси, а на него, государя, мати его святая великая соборная церковь, которая породила водою и духом и хрисмою на царство помаза, обидима плачет, яко сирота последняя, и яко вдова обругана от прелюбодея Крутицкого митрополита (21), прося отмщения, присно предстоя у двора его.— Он же, государь, неточию мстит, но и соблаговоляет прелюбодейству его. Сам же вся сущия ея вещи в дом свой посилова, еже чада церковная и нищия питашеся, злым человеком емля истощевает соколником и псарям, и прочим неблагодарным злодеем, иже угодная ему творят, яко же и при патриарсех, елико нужнейших на церковный обиход и на нищих потребу изобиловаше малые останки, к нему же в руце отхождаху, сим образом устав положен, не вем по каким законом, еже празднуючи патриарси Успения Пресвятыя Владычицы нашея Богородицы и Приснодевы Марии и неделю Ваия и преставление святаго Петра митрополита Московского и всея Росии чюдотворца, и во таковые три праздника призывается от патриарха и от всего священнаго собора, царь и со всем сигклитом на праздники, и по совершении святого праздника зовет патриарх царя хлеба есть и по ядении хлеба подносить патриарх царю великие дары от останков церковных вещей. И царь приемлет те дары, отсылает во свою царскую казну, в том все останки церковных оброков скончаваются от года до года, а лепо было на таковые великие три праздники самому царю и царице и царевичем и царевнам и князем и бояром и всем велможам и всем людям приносити дары, по писанному: да не явишися тощь пред Господем Богом твоим кождо по постижению руки своея, по благословению Господа Бога своего, иже дал есть тебе, якож и инде Господь заповеда, глаголя: заповедь сыном Иизраилевым и глагола к ним, рекий: дарове Мои и даяния Моя и приноси Мои в ввоню благовония, да снабдите приносити Мне на вся праздники Моя. Начаток же от гумна и от точила твоего да Ми принесеши, первенца сынов твоих да Ми даси. Такожде сотвориши от телца твоего и от овцы твоея, и от осляте твоего и начаток стрижения твоего. Они же претворше cиe Божественное повеление на ся, вси сошедшеся в праздник в церковь господню, ничто же приносяще даров Господеви, и по совершении святыя литоргии, у патриарха напитавшеся доволно и приемше дары отходят в домы своя, радующеся и веселящеся, ничтоже благо пред Господем сотворше, или дары принесше, но сами, аки оброк вземше от Божественнаго наследия. Кого таковии пощадят, Бога не щадяще и достояние Господне, и глаголют: патриарх сим и сим благословил сего и оного, а патриарх со всякою нуждею, аки оброчник, покупает драгою ценою у сего и оного, а неблагодарнии людие, ведая обычное патриарху к празднику пристроение, сугубые и тригубые цены емлют, за сребрянные сосуды, за соболи, и за золотые бархаты, и отласы, и за камки, и прочие потребы. И почто таковым и в храм божий приходити, сами не приносят ничтоже, но и собранное истощают. И слышано есть выше сего, колико зло есть обида, а се ли не обида, ей, обида есть, и не мала святей велицей церкви. Понеже от боязни и страха, не может сего патриарх преложить, аки Божия устава или обета. Сами, якоже царское величество во святей церкви при святом крещении отречеся сатаны и всех дел и всех ангел его и всея службы его и всего студа его и всея славы его и сочетася Христу Царю и Богу и верова и исповеда святый символ, якоже святая церковь прият. Сочетание же Христу не ино что, разве веровати во Отца и Сына и Святаго Духа, Святую Троицу Единосущную и Неразделную, во едино Божество, во святое священное Евангелие и святых Апостол и святых отец семи вселенских соборов, якоже и самое то свидетелствует молитвословие в начале оглашения ко крещению, еже, наложив руки, архиерей глаголет: слушай зде самыя истины, — о имени Твоем, Господи Боже истины и Единороднаго Твоего Сына и Святаго Твоего Духа, возлагаю руку мою на раба Твоего, сподоблшагося прибегнути ко святому имени Твоему и под кровом крил Твоих сохранится, отстави от него ветхую оную прелесть, исполни его еже в Тя веры и надежды и любви, да разумеет, яко Ты ecи един Бог истинный и единородный Твой Сын, Господь наш Иисус Хриотос и Святый Твой Дух, даждь ему во всех заповедех Твоих ходити и угодная Тебе сохранити, яко аще сохранит сия человек, жив будет в них.

Зриши ли, ответотворче, ругателю Христов и попирателю святыя православныя веры, что в начали священословие показует: даждь ему, рече, во всех заповедех Твоих ходити и угодная Тебе сохранити, яко аще сохранит сия человек, жив будет в них; а иже аще не сохранит, будет ли жив в век? и cиe слово не разнит и от самых святых Евангелских словес.—Господу глаголющу ко пришедшим к нему июдеом: аминь, аминь глаголю вам, яко слушаяй словесе Моего и веруяй пославшему Мя, имать живот вечный и на суд не приидет, но прейдет от смерти в живот, а не веруяй уже осужден есть; якоже на ином месте речеся: отметаяйся Мене и не приемляй глагол Моих имать судящаго ему слово, еже глаголал, то судит ему в последний день; что же чюдно царское величество по святому Евангелию сотворил любо, дабы и мы свидетели были добрых его дел по писанному, яко да видят ваша добрая дела и прославят Отца вашего, иже на небесех. Не слышал еси, яко вера без дел мертва есть, и аще кто верует без дел, умерл есть прежде общия смерти таковый. <…>

… и не вем что любо царское величество делает от Евангелских заповедей, но своя человеческия всюду предпочел паче Христовых. <…>

Господу глаголющу: аще любите Мя, заповеди Моя соблюдите. И паки: паки имеяй заповеди Моя, и соблюдаяй их, той есть любяй Мя. Заповеди, которыя не иныя, но тыя, якоже закон учителю сказа Господь: возлюбиши Господа Бога твоего всем сердцем твоим и всею душею твоею и всею мыслию твоею. Си есть первая и болшая заповедь: подобна же есть ей вторая: возлюбиши искренняго своего, яко сам себе, в сию обою заповедию весь закон и пророцы висят. И аще бы государь царь любил Бога, любил бы убо мене, якоже пишет: любяй Бога любит ближняго своего, — якоже и Господь сам свидетельствует: не любяяй Мя, словес Моих не соблюдает, и слово, еже слышасте, несть Мое, но пославшаго Мя Отца. <…>

Просящему, рече, у тебе дай, и хотящаго от тебе заяти не отвратися, и еже любити враги своя и добро творити ненавидящим. Благослови кленущая и молитися за творящих напасть и изгонящая, и милостыню творя не являти и молитися в клети, и должником оставляти долги, оставляти и еже отпущати грехи, и поститися не помрачающе лица, и не на показание человеком и сокровищ не скрывати на земли, но на небеси, двема господинома не работати и не пещися, что ясти и пити и во что облещися, и еже что хощем сами творити умом, а иже не просто не любит, но и гонит, и не еже питает, но и сущее отъемлет, которых мук будет достоин. <…>

…иже от Христа отвержется во все время живота своего должен есть плакатися, на исходе же жития сподобится святаго причащения. — Како же ты глаголеши, царю обирати naтриархов и митрополитов и архимаритов и игуменов, не имеющи власти и своего обещания к Богу не сохранив ни в чем, и того ради ни входа церковнаго достоин и вся дни живота своего каятися, и во исходе жития своего сподобитися причащения. Откуду ты такия блядивыя, проклятые законы приносишь, и глаголешь во олтарь царю входити причащатися, ему же божественный Златоуст на праг церковный вступати не повел, аще и царь есть клятвопрестуиник. Царь же не единою, но трегубо, едино убо во крещении и другое на поставлении царьстем, егда apxиерей помаза его на царство, тогда завет ему положи, глаголя: о Святем Дусе господин и возлюбленный сын святыя церкве и нашего смирения, царь и великий князь Алексей Михайлович всея Русии самодержец! Се от ныне от Бога поставлен ecи царь и великий князь, по данней нам благодати от Пресвятаго и Животворящаго Духа, рукоположением нашего смирения, со Освященным собором, во святей велицей церкви Успения Пресвятыя Богородицы, и ты, господине и сыну, боговенчанный и православный царь и великий князь Алексей Михайлович всеа Росси самодержец, имей страх Божий в сердцы и сохрани веру христианскую греческаго закона честну и непоколебиму и соблюди царство свое честно и непорочно, яко же ныне приял еси от Бога, и люби правду и милость и суд правый и к послушным милостивное, и ко святей же соборной церкви и ко всем святым церквам имей веру и страх Божий и воздавай честь, понеже в ней, царю, второе порожден еси от святыя купели духовным своим порожением, и ко святым честным монастырем велию веру держи к нашему смирению и ко всем своим богомолцам, о Святем Дусе царское свое духовное повиновение, по Христову Евангелскому словеси: слушаяй бо вас, Мене слушает, отметаяйся вас, Мене отметается, отметаяй же ся Мене, отметается и Пославшаго Мя. И сего ради ведяще и се: елико кто честь святителю воздаст, и та честь самому Христу восходит, от него же и мзды приимут сторицею и прочее пространнее сего выше написано есть. И ничтоже от сицевых сотворил, но все ни во что положил. Третие же, егда молил царь Новгородскаго Никона митрополита со Освященным собором на патриаршество, Никон много отрицался такова великаго бремене (22). И по многом царском молении и всего священнаго собора Никон митрополит царю и великому князю Алексею Михайловичу всеа Русии говорил во святей велицей соборней апостолстей церкви, Господа Бога и Спаса нашего Иисуса Христа свидетеля поставляя и Пресвятую, Пречистую Владычицу нашу Богородицу и Приснодеву Марию и святых, Ангел и Архангел, и святаго славнаго Пророка и Предтечю Крестителя Иоанна, и святых славных и всехвалных Апостол и святых отец седми вселенских соборов и всех святых пред священным собором всем и пред его царским сигклитом и пред всеми людми, егда изволит Бог Никону митрополиту на патриаршестве, и Никон митрополит, усмотря во царе и великом князе порок, который противен евангелским святым заповедем, или противно что святым апостолским и отческим правилом, и ему Никону, по писанному во псалмех, не стыдяся, говорити пред цари о заповедех Господних, и святых Апостол и святых отец и пред бояры, а ему государю царю и его государевым бояром слушати во всем. И он, государь, и его государевы бояра все обещалиса во святей велицей церкви, пред Господом Богом и пред Святою Богородицею и всеми святыми и всем священным собором, заповедей Христовых и святых Апостол и святых отец правил слушати и ничтоже инако коею люботщетною хитростию, по преданию человеческому и по стихиям мира сего, мудствовати. И отисперва убо был царь благ, кроток, послушлив, и Никон на патриаршестве был, а как царь и великий князь развратился со святою соборною апостолскою церковью, и святыя Божия заповеди и святых Апостол и святых отец правила в презрении положил и Никона патриарха не почал слушать, но и укоряти неподобно, и Никон патриарх, засвидетелствовав в той же велицей соборней апостолской церкви пред Господом Богом и Спасом нашим Иисусом Христом и пред Святою, Пречистою, Преблагословенною Владычицею нашею Богородицею и Приснодевою Mapиею и святыми Ангелы и всеми святыми и царю и великому князю с ризничим посылал, написав своею рукою, чего ради патриарх Никон отходит, дая место гневу царскому (23). И он, государь неведомо, чел или нет, только то писмо Никона патриарха назад прислал, и Никон по триех днех с Воскресенскаго подворья стал в Воскресенский монастырь. И царь государь и до сего времени непрестанно гнев свой держит на Никона патриарха, неведомо за что, и всяким ложным глаголником веру имет, и многих добрых людей розослал, священников и дьяконов, и монахов и мирских, чрез Божественныя заповеди, и сам на ся чин святительский и власть церковную восприял, чрез Божественныя уставы и чрез свою клятву, еже трегубо клялся ово во крещении, ово во царское поставление, ово в Никоново патриарха наставление, еже не мудрствовати паче, еже подобает благочестивым царем. Он же, государь, не точию архиереов, игуменов и священников и дьяконов во свою волю привлече, множицею и Никона патриарха в суд нудил с Романом Бабарыкиным и с Иваном Сытиным пред своим околничим Осипом Сукиным и пред думным дворянином Иваном Баклановским (24). И Никон патриарх говорил тем думным людям и дьяком, что неподобно то царское величество деет, еже нас архиереов, чрез Божественныя уставы, мирским судиям судити. Патpиapxa и епископа всею епархиею судят, аще ли невозможно, менши 12 нелзе судити, презвитера 6 епископов, диакона 3 епископа, а митрополита без патриарха не судить. И Осип Сукин говорил патриарху, смотря в наказ государев: будет ты станешь отвечать и с Иваном Сытиным и с Романом Бабарыкиным, и государь уважит по своему. <…>

Да боярин же князь Никита говорил Никону патриарху, что де ты отчитаешь государя от Христианства… как де у тебя и язык тот воротится говорить, не стерпит де тебе Бог, добро бы де ты смирнее был. И патриарх Никон говорил: не точию от злодейства вашего в кельи готов правды ради сидети, но и умрети готов есмь. Да боярин же говорил: ты де уж и сам бывшей патриарх. — Почему бывшей? — Да ведь де ты оставил уж патриаршество. — И патриарх говорил: патриаршества не оставливал и святительства, злобы ради вашея отшел (25), дал место гневу, по писанному, исполняя заповедь Христову: Егда же гонят вы во граде сем, бегайте во другий; аминь глаголю вам, не имате скончати грады Иизраилевы, дондеже приидет сын человеческий. Несть ученик над учителем своим, ниже раб над господином своим; довлеет ученику, да будет, яко учитель его, и раб, яко господь его, аще господина дому веелзевула нарекоша, колми паче домашняя его, не убойтеся убо их. И паки инде рече Господь: оставите их, вожди суть слепи слепцем. Слепец же слепца аще водит, оба в яму впадетася. — И паки: и иже аще не приимлет вас, ниже послушает словес, исходящее из дому или из града того, оттрясете прах ног ваших, аминь глаголю вам, отраднее будет земли содомстей и гоморстей в день судный, неже граду тому. …И аще нас, вины ради благословныя отшествие сотворших, бывшим патриархом порицаете, то уже и законополжника нашего Господа Бога и Спаса нашего Иисуса Христа укоряете. <…>